Lizette en die Silwer Beker (Afrikaans); 1983 Lizette en die Silwer Beker is die verhaal van 'n lewenslustige meisietjie se eerste jaar opskool. Kordaat en vol selfvertroue stap sy die eerste dag die sub A-klas binne. Aan die begin verloop alles glad, maar reeds voor die dag om is, leer Lizette 'n belangrikke lewensles... Soos die jaar vorder, kom sy ook agter dat daar in 'n skool baie meer te leer is as net lees, skryf en reken.
	Lizette en die Kapokkies (Afrikaans); 1984; Lizette en die Kapokkies is nog 'n lekkerleesboek vir kinders va 6-9 jaar oor die lief en leed van die gewilde klein Lizette en haar Sub A-maats, Anna, Erna, Gert en Frans. Hierdie keer beland Lizette in die hospitaal waar sy allerhande nuwe dinge leer waarvan haar maats nog niks weet nie. Boonop kry sy as troosprys van haar oupa 'n ongewone present. Maar dit is net waar die lollery begin...
	Lizette en die Tandmuis (Afrikaans); 1985 Lizette is bitter ontevrede. Van haar maats kan al spog met amperse haasbekke. Hulle kan met smaak vertel van die tandmuis en van presente wat hy vir hulle bring. Maar haar tande sit waar hulle sit - totdat daar 'n ongeluk gebeur en die een tand losraak, net reg vir uitpluk. O lekker! Maar haar vreugde is van korte duur. En die aand is daar niks om in haar skoen te sit nie, niks om vir die tandmuis in 'n briefie te vertel nie... Of is daar dalk?
	Wanneer dit moeilik gaan (Afrikaans) , NG Kerk Publishers; 1984
	Miempie (Afrikaans) / Mimi (English translation by Madeleine van Biljon) Daan Retief; 1990 Miempie groet elke oggend in ou Tafelberg, want hul huis is so naby aan die berg dat sy amper daaraan kan raak. Sy is in die wolke toe sy gekies word om 'n feetjie te wees in die operette wat by die skool opgevoer word. Toe tref die ongeluk haar! Terwyl almal oefen, lê sy twee bene in die lug met waterpokkies. Die aaklige waterblasies jeuk en brand en Miempie is sommer op moedverloor se vlakte. Om alles te vererger, ry iemand vir snuffles, haar dierbare brak, raak.
	Die Geheim van Groukatlaagte (Afrikaans); 1995/1997 'n Uitnodiging om in die middel van 'n nat en triestige Kaapse wintervakansie op 'n Karooplaas te gaan kuier, is nie te versmaai nie. En as daar nog boonop perde en 'n spookhuis op die buurplaas is, is so 'n uitnodiging onweerstaanbaar - veral vir Wikus Jordaan, spookkenner by uitnemendheid. Wikus en sy maats Karel en Giepie word hartlik deur oom Boet en tant Lenie ontvang. Reeds daardie eerste nag word Wikus wakker van donderende perdehoewe, maar toe hy vir oom Boet daaroor uitvra, praat die gou oor ander dinge. En toe oom Boet en tant Lenie boonop alles moontlik doen om te keer dat die seuns Groukatlaagte toe gaan, weet Wikus die oumense steek iets weg. Maar so maklik laat Wikus hom nie onderkry nie. Die geheim van elke winter se spokery op Groukatlaagte gaan hy oplos, kom wat wil...
	Die Stem in die Trommel (Afrikaans); 1995/1998/2000/2005 Tien dae se vakansie by die see! Wikus kan skaars wag. Toe oom Gawie en tant Koba vir hom, Karel en Giepie kom oplaai, is hulle bewapen met visstokke en swembroeke en 'n groot lus vir vakansie hou na die eksamen. Daardie eerste naweek is ook een groot lekkerte en die seuns se woema het geen einde nie. Maandagaand met springgety gaan pluk hulle by Sandhoek swartmossels en Wikus het binne 'n japtrap sy toegelate vyf-en-twintig mossels. Maar hoe voel dit nou aanmekaar of iets hom vanuit die donker dieptes dophou? Die maanlig blink op die verste rotsbank en hy besluit om te gaan ondersoek instel. En daar, in 'n diep skeur, sien hy iets donkers. Min het Wikus geweet wat hierdie vonds uiteindelik sou oplewer...
	Skaduwee op Siwet (Afrikaans); 1995/1997 Toe Prof Pieta vir Wikus en sy maats nooi om saam Bosveld toe te ry om sy nuwe huis te bekyk, is hulle dadelik vuur en vlam. Wat maak die hitte en die muskiete nou saak as jy by 'n gesogte vakansieoord kan gaan kuier? Maar van die begin af lyk dinge nie pluis nie. Wikus verbeel hom die diere in die muurtekening beweeg, hy voel skielik verskriklik naar en swak, en die eerste aand kry iets of iemand hom aand die keel beet en verwurg hom byna.Die tweede aand raak hy so siek dat hy in die hospitaal opgeneem moet word. Prof Pieta, Karel en Giepie besluit hulle moet, kom wat wil, agterkom wat aangaan. Maklik is dit egter nie, en in die proses word Prof Pieta ook deur die Skaduwee toegetakel.
	Droomkamer op Donkerhoek (Afrikaans); 1996/1998; Wikus en Karel was nie baie opgewonde oor die vooruitsig om die langnaweek Giepie se tant Nelda op Donkerhoek te gaan oppas nie, maar dit was net tot hulle die interessante ou huis, weggesteek tussen die somber bome, gesien het. Karel wou onmiddelik net oral begin fotostudies doen en Wikus was omtrent in sy skik met die hoefyster, weerhaan en bossie knoffel wat hom laat vermoed het dat Donkerhoek dalk sy eie spook of twee het. En dit was nog voordat hulle in die kelder gekom het!
	Die Osirisraaisel (Afrikaans); 1997 Toe Wikus se ekstentrieke ouma met haar verflenterde bakkie en 'n ou kas agterkop by Wikus-hulle se hek ingewaai kom, kon die drie maats net verdwaas toekyk. En toe sy ewe koetjies verklaar dat die kas vir Wikus is "vir al daardie goed wat so rondlê..." was dit vir hulle eers snaaks. Maar min het Wikus, Karel en Giepie kon raai op watter paaie die kas hulle sou vat en watter geheime daarin opgesluit is.
	Skimme van Gister (Afrikaans); 1998 Alles het begin by die pastelskets wat Wikus by die skoolkermis gewen het. Dit was asof die ding hom gehipnotiseer het. Hom wou intrek en deel maak van gebeure waar iets nie lekker pluis was nie... Sal Wikus die raaisel van die hartseer vrou in sy stoel kan oplos? En wat gaan Karel en Giepie doen om hom te help?
	Dwaalgees van Duiwelskantoor (Afrikaans); 1999 Wikus en sy twee vriende is op 'n graadnege-geskiedenistoer in Mpumalanga. Hulle is deel van die groep wat Kaapschehoop toe gaan - 'n afgeleë plekkie wat eens op 'n tyd Duiwelskantoor geheet het. Sommel al op pad soontoe kom Wikus agter iets is nie pluis nie. By die ou NZASM-tonnel by Waterval-Boven sien hy 'n man op 'n perd wat vir hom verdag lyk en hy voel hoe sy hare rys en die hoendervel teen sy arms oplig. Op Kaapschehoop aangekom, lyk alles aanvanklik normaal, maar dit is eers toe hulle die aand in die ou Royal Hotel gaan slaap, dat die poppe begin dans...
	Spookhuis by die See (Afrikaans); 2003/2005 Hierdie keer gaan Wikus, Karel en Giepie vir 'n naweek saam met Giepie se ouers in Mosselbaai kuier. Dis is 'n familiesaamtrek en omdat daar te veel mense in die groot huis is, moet die drie vriende in Giepie se oom-hulle se ou houthuis aan die rant van die dorp slaap. Gou egter kom Wikus agter iets is nie pluis met die huis nie. Hy hoor en sien dinge wat die ander twee nie kan nie... Wat het dit alles te doen met die trekklavier wat Giepie se oom op die strand opgetel het, en die ontwykende klein wit bokkie wat gereeld sy verskyning naby die ou houthuis maak? En dan is daar nog die geheimsinninge ou man wie die mense in die omgewing ten alle koste vermy.
	Die Geeste van die Amathole (Afrikaans), Human & Rousseau; (Pre-Produksie) Duiwel in die Bos, Human & Rousseau (Pre-Produksie)
	By die Lêplek van die Leeus (Afrikaans) , JL van Schaik; 1997 Met haar toelating tot die arbeidterapiekursus by die universiteit leer Dudu 'n nuwe wêreld ken - ver weg van Sebokeng en ouma Thandi, ver van die mank Alfred wat deur die heks getoor is en nie naby ander mense mag kom nie, ver van haar Pule wat met sy eie hande vir haar 'n karos bebrei het, die karos wat die dooies een aand in Atteridgeville se parkie by haar gesteel het. Haar nuwe wêreld is in talle opsigte tegelyk aantreklik en verwarrend. Die Vissers probeer hul bes om haar in hulle huis te laat tuis voel, maar ouma Magrieta maak geen geheim van haar afkeer van Dudu nie. Die norse houding van Bettie, die huishulp, is ook heeltemal onbegryplik. By die lêplek van die leeus bied stof tot nadenke, maar is allereers die uitsonderlike verhaar van 'n meisie wat haarself in 'n maalkolk van vooroordeel moet vind en handhaaf.
	Oupa Daan laat sy kierie staan (Afrikaans) , Lux Verbi; 2007 'n Oupa is vir 'n kind 'n groot lekkerkry. En oupa Daan is nie 'n uitsondering op hierdie reël nie! Sy kleinkinders, Albert, Karin, Coert en Wanda, kan nie genoeg van hom kry nie. Elke oggend word daar in die Malan-huishouding 'n ritueel gevolg: Wanneer hulle aan sy kamerdeur kom klop om hom met koffie en beskuit te bederf, is dit tyd vir speletjies en rympies.
	Bonsie, die rooi rubberbal (Afrikaans), Golden Books Uitgewers, 2007 Bonsie, die rooi rubberbal lê in die modder en wens so dat sy maatjies hom agter die muur sal vind. Vuzi en Thandi kry weer die rooi rubberbal na 'n reënstorm en gee vir hom 'n nuwe voorkoms. 'n Eg Suid-Afrikaanse storie met aangename rymwoordjies.